abr ka mahtab ka bhi tha
ik zamana sharab ka bhi tha
kuchh tabi.at bhi apni maa.il thi
kuchh jhamela shabab ka bhi tha
rat-bhar teri chandni aur din
yaad ke aftab ka bhi tha
teri shohrat ke ḳhaas rangon men
ik mire intiḳhab ka bhi tha
chandni men tire badan ka nikhar
husn kuchh mahtab ka bhi tha
mausam-e-vasl teri zulfon men
astana gulab ka bhi tha
kuchh mire shauq ki tajalli thi
kuchh sarakna naqab ka bhi tha
tund lahron se kya shikayat ho
jism nazuk habab ka bhi tha
umr zindan-e-jabr men guzri
aur abhi din hisab ka bhi tha
kuchh tira intizar tha aur kuchh
mai-e-gul rang-o-nab ka bhi tha
ye saza-o-jaza ki baat na thi
Dar saval-o-javab ka bhi tha
tum agar DhunDte tah-e-dil tak
rasta inqalab ka bhi tha
jis men tum bas ga.e kabhi vo ghar
dil-e-ḳhana-ḳharab ka bhi tha
ham to Thahre kashida-sar lekin
hukm-e-hakim itaab ka bhi tha
vaqt ke chor-a.ine men ‘munir’
aks chashm-e-pur-ab ka bhi tha
Leave a Reply