Ab Uski Yaad Satane Ko Bar Bar Aae

ab us ki yaad satane ko baar baar aae

vo zindagi jo tire shahr men guzar aae

ye bebasi bhi nahin lutf-e-ikhtiyar se kam

khuda kare na kabhi dil pe ikhtiyar aae

qadam qadam pe gulistan khile the raste men

ajiib log hain ham bhi ki su-e-dar aae

na chahchahe na surud-e-shaguftagi na mahak

kise ab aisi baharon pe e’tibar aae

junun ko ab ke gareban se kya milega ki ham

ba-faiz-e-mausam-e-gul pairahan utaar aae

tiri lagan ne zamane ki khaak chhanvai

tiri talab men tamam arzuen haar aae

ye fakhr kam to nahin ku-e-yar men ‘nikhat’

na sharmsar gae the na sharmsar aae

Leave a Comment