ab unhen apni adaon se hijab aata hai
chashm-e-bad-dur dulhan ban ke shabab aata hai
hijr men bhi mujhe imdad-e-ajal hai darkar
meri turbat pe na aa tujh se hijab aata hai
diid aḳhir hai ulaT dijiye chehre se naqab
aaj mushtaq ke chehre pe naqab aata hai
kis taraf josh-e-karam teri nigahen uTThin
kaun mahshar men saza-var-e-itab aata hai
maut ki niind bhi ab chain se sona malum
ki janaze pe vo gharat-gar-e-ḳhvab aata hai
dil ko is tarah Thahar jaane ki aadat to na thi
kyuun ajal kya mire naame ka javab aata hai
jalva-e-rang hai nairang-e-taqaza-e-nigah
koi majbur tamasha-e-sarab aata hai
ho gaya ḳhuun tire hijr men dil ka shayad
ab tasavvur bhi tira naqsh-bar-ab aata hai
milti julti hai miri umr-e-do-roza ‘fani’
ji bhar aata hai agar zikr-e-habab aata hai
Leave a Reply