ab kahin saya-e-gesu bhi nahin
chain dil ko kisi pahlu bhi nahin
jaane kya soch ke ḳhush baiTha huun
mausam-e-gul bhi nahin tu bhi nahin
ab tiri nazr karun kya ai dost
ab miri ankhon men aansu bhi nahin
kis ko siine se laga kar ro.en
dasht men ab koi aahu bhi nahin
muskura uThti thi vo aankh kabhi
aur ab jumbish-e-abru bhi nahin
dil ko hasrat hai tire milne ki
aur halat pe qaabu bhi nahin
Leave a Reply