ab apni zaat ka irfan hone vaala hai
ḳhuda se rabta asan hone vaala hai
ganva chuka huun main chalis saal jis ke liye
vo ek pal miri pahchan hone vaala hai
isi liye to jalata huun andhiyon men charagh
yaqin hai ki nigahban hone vaala hai
ab apne zaḳhm nazar aa rahe hain phuul mujhe
shu.ur-e-dard pasheman hone vaala hai
mire liye tiri janib se pyaar ka iz.har
mire ghurur ka saman hone vaala hai
ye choT hai miri mushkil-pasand fitrat par
jo marhala tha ab asan hone vaala hai
agar ghurur hai suraj ko apni hiddat par
to phir ye qatra bhi tufan hone vaala hai
bahut uruuj pe ḳhush-fahmiyan hain ab us ki
vo an-qarib pasheman hone vaala hai
tu apna haath mire haath men agar de de
to ye faqir bhi sultan hone vaala hai
charagh-e-dar ki lau maand paḌ rahi hai ‘nadim’
phir apne naam ka elaan hone vaala hai
Leave a Reply