asman mil na saka dharti pe aaya na gaya
zindagi ham se koi Thaur banaya na gaya
as.man mujh se miyan hujre men laaya na gaya
sha.iri chhoḌ di mafhum churaya na gaya
naukri kii, likhi nazmen, sukun paaya na gaya
shahr-e-dil tujh ko kisi taur basaya na gaya
ghar ki viraniyan rusva huiin bekar men hi
mujh se bazar men bhi vaqt bitaya na gaya
josh men Dha to di rishte ki imarat lekin
donon se aaj talak malba haTaya na gaya
ḳhuun ke daagh na aa jaa.en mire lahje men
is liye ghazlon ko aḳhbar banaya na gaya
dikh na jaa.e tu bichhaḌti hui bas is Dar se
mujh se ankhon ko koi ḳhvab dikhaya na gaya
apna hissa bhi to manga hai zamin se main ne
as.man yuun hi mire sar pe giraya na gaya
jo tiri yaad ke panchhi na ruke kya hai ajab
umr bhar dil men to tujh ko bhi biThaya na gaya
zaat maz.hab ki zaban naam usi ke to hain sab
ḳhud ko jis qaid se ta-umr chhuḌaya na gaya
ḳhaak dariya ke kinaron ko mila.unga main
ḳhud ko hi aaj talak ḳhud se milaya na gaya
mera iman hua ḳharch jise paane men
kya ghazab hoga jo us shai ko bachaya na gaya
Leave a Reply