ashiqi men hai jaan ka khaTka
aur bhi kuchh bura bhala khaTka
yaar sayyad baghban ka hua
ye naya aur ik bandha khaTka
kaan aahaT ki raah se na haTe
dil men tha kis ke aane ka khaTka
vahi kavish mizha ne ki aḳhir
jis ka avval se dil men tha khaTka
bulbul-e-pak-bin hai ashiq-e-gul
baghban tu na khaTkhaTa khaTka
be tire yaar sair-e-gulshan men
phuul ankhon men ḳhaar sa khaTka
tujh ko dekha uTha uTha kar sar
saans ka bhi agar hua khaTka
ishq ke hain ‘vaqar’ chaar unsur
ḳhauf andesha-o-dagha khaTka
Leave a Reply