asan har ik baat ko dushvar karo tum
iqrar jahan main karun inkar karo tum
jab beach bhanvar ziist ki kashti kabhi Duube
mallah bano aur mujhe patvar karo tum
daman pe mohabbat ka koi daagh laga kar
phir pesh-e-zamana mujhe lachar karo tum
zanjir-e-mohabbat yunhi pairon men saja kar
vahshat ka tamasha miri har baar karo tum
har baat pe Thahra ke mujhe morid-e-ilzam
isar-o-vafa ko mire be-kar karo tum
ye zo.am-e-ḳhudi hai ki tamasha-e-ḳhudi hai
sar bech ke namus ko dastar karo tum
Leave a Reply