aarzu ko dil hi dil men ghuT ke rahna aa gaya
aur vo ye samjhe ki mujh ko ranj sahna aa gaya
ponchhta koi nahin ab mujh se mera hal-e-dil
shayad apna hal-e-dil ab mujh ko kahna aa gaya
sab ki sunta ja raha huun aur kuchh kahta nahin
vo zaban huun ab jise danton men rahna aa gaya
zindagi se kya laḌen jab koi bhi apna nahin
ho ke shal dhare ke ruḳh par ham ko bahna aa gaya
laakh parde iztirab-e-shauq par Daale magar
phir vo ik machla hua aansu barahna aa gaya
tujh ko apna hi liya aḳhir nigar-e-ishq ne
ai urus-e-chashm le moti ka gahna aa gaya
pi ke aansu si ke lab baiTha huun yuun is bazm men
dar-haqiqat jaise mujh ko ranj sahna aa gaya
ek na-shukre chaman ko rang-o-bu deta raha
aa gaya haan aa gaya kanTon men rahna aa gaya
lab pe naghma aur ruḳh par ik tabassum ki naqab
apne dil ka dard ab ‘mulla’ ko kahna aa gaya
Leave a Reply