Shahzad Ahmad
aap bhi nahin aa.e niind bhi nahin aa.i
nim-va darichon se jhankti hai tanha.i
jaag jaag uThte hain gan-kali ke miThe sur
chheḌ chheḌ jaati hai gesuon ki purva.i
yuun mire ḳhayalon men teri yaad raqsan hai
jis tarah fazaon men gunjti hai shahna.i
gard-e-rah bhi chup hai sang-e-mil bhi ḳhamosh
taliban-e-manzil ki kuchh ḳhabar nahin aa.i
ik taraf gham-e-duniya ik taraf tiri yaden
aaj kal hayulon se khelte hain sauda.i
jin gulon ne paaya ho rang-o-bu bagulon se
kaun chhin sakta hai un gulon ki ra.ana.i
ye tane tane abru ye hara-bhara chehra
ham ne qahr si lazzat pyaar men nahin paa.i
ab to saaf sunta huun apne dil ki har dhaḌkan
aur kya dikha.egi ye tavil tanha.i
bazm-e-dost men ‘shahzad’ tum bhi kuchh hanso bolo
chup rahe se hoti hai duur duur rusva.i
Leave a Reply