Aansu Bhi Baha Kar Dekh Liye Soz-E-Gham-E-Pinhan Kam Na Hua

Poet

aansu bhi baha kar dekh liye soz-e-gham-e-pinhan kam na hua

dil men tiri ulfat ka sho.ala sho.ala hi raha shabnam na hua

duniya ki baharon men kho kar main apni nazar se chhup jaata

sad-shukr dil-e-agah mira dil ban gaya jam-e-jam na hua

tha dagh-e-tamanna ruh-shikan kuchh himmat-e-gham kaam aa hi ga.i

dil men to baḌe tufan uThe aansu na bahe matam na hua

ham shukr-e-sitam yuun karte hain jaise koi ne.amat mil jaa.e

lekin ye tira andaz-e-nazar nashtar hi raha marham na hua

bikhre hue tinke chun chun kar ta.amir nasheman kar to liya

ta.amir-e-nasheman se lekin ehsas-e-tabahi kam na hua

kaafi hai ‘faridi’ ko vo nazar jo marham-e-zaḳhm-e-hasti hai

tu ne jise apna gham baḳhsha phir us ko kisi ka gham na hua