Alok Mishra
ankhon ka puura shahr hi sailab kar gaya
ye kaun mujh men nazm ki surat utar gaya
jangal men teri yaad ke jugnun chamak uThe
maidan siyah-shab ka ujalon se bhar gaya
varna siyah raat men jhulsa hua tha main
ye to tumhari dhuup men kuchh kuchh nikhar gaya
jhuma thirakte nachte joḌon men kuchh ghaḌi
dil phir na jaane kaisi udasi se bhar gaya
donon ana men chuur the an-ban si ho ga.i
rishta naya naya sa tha kuchh din men mar gaya
pahle kuchh ek din to kaTi mushkilon men raat
phir tera hijr meri ragon men utar gaya
hathon se apne ḳhud hi nasheman ujaaḌ kar
dekho udaas ho ke parinda kidhar gaya
ik chiḳh asman ke daman men so ga.i
dil ki zamin pe dard har ik su bikhar gaya
Leave a Reply