ankhen asir-e-ḳhvab thiin ḳhvab ek hi se the
har ek jaan pe ab ke azaab ek hi se the
rah-e-vafa-e-shauq men vamandgi ke ba.ad
jo bhi mile the ḳhar-e-gulab ek hi se the
bainassutur un ke ma.ani juda na the
jitne bhi muḳhtalif the nisab ek hi se the
vo to kahin nahin the jinhen DhunDhta tha main
jo rah ga.e the zer-e-naqab ek hi se the
kis kis se aur puchhte us shahr ka pata
vo jo hamen mile the javab ek hi se the
barse to vo bhi pyaas ki shiddat baḌha ga.e
mere liye to saare sahab ek hi se the
Leave a Reply