Ehsan Danish
aankh men aansu hain ehsas-e-masarrat dil men hai
ek firdaus-e-nazara aap ki mahfil men hai
har jafa teri munasib har sitam tera durust
ab vahi meri tamanna hai jo tere dil men hai
jab ba-juz mahbub ho jaati hai ojhal ka.enat
ik maqam aisa bhi jazb-e-shauq ki manzil men hai
fasl-e-gul men be-tahasha hansne vaalo hoshiyar
iztirab-e-dil ka pahlu bhi sukun-e-dil men hai
jis ko duuri se huzuri men siva ho iztirab
vo pareshan-e-mohabbat kis qadar mushkil men hai
dahr ke hangama-e-shaiḳh-o-barahman se buland
aur bhi hangama ik girdab-e-nuh-e-dil men hai
ab koi shayan-e-jalva hai na shayan-e-kalam
tu usi manzil men behtar hai ki jis manzil men hai
na-saza hai is ke jalvon ki nazakat ke liye
vo gham-e-hasil jo tere ishq ke hasil men hai
main to ḳhud uThne ko huun badlo na andaz-e-nazar
tum jo kahte hichkichate ho vo mere dil men hai
apne markaz se sitaron par jo karta huun nazar
jis ko jis manzil men chhoḌa tha usi manzil men hai
mom kar deti hai jo faulad-o-ahan ka jigar
vo bhi ik jhankar avaz-e-shikast-e-dil men hai
kaun hai ‘ehsan’ meri zindagi ka razdar
kya kahun kis tarah marne ki tamanna dil men hai
Leave a Reply