Saleem Betab
aankh ke kunj men ik dasht-e-tamanna le kar
ajnabi des ko nikle dil-e-tanha le kar
dekh to khol ke tarik makan ki khiḌki
ham tire shahr men aa.e hain ujala le kar
ham bhi pahunche the gulistan men sukun ki ḳhatir
aa ga.e zehn men tapta hua sahra le kar
ab nigahon ki jarahat ko liye sochte hain
kyuun ga.e bazm men ham zauq-e-tamasha le kar
kab se fariyad-ba-lab ab-talab hai shirin
aaj farhad bhi nikla nahin tesha le kar
ru-siyah tere bane chashm-o-charag zindan
ghuum ab shahr men tu chehra-e-zeba le kar
is chaka-chaund men ab mujh ko dikha.i kya de
aa ga.e aap to ik nuur ka dariya le kar
jab bhi halat ke sho.alon men ghira huun ‘betab’
aa hi pahuncha hai koi phuul sa chehra le kar
Leave a Reply