Aaine Ke Ru-Ba-Ru Ek Aaina Rakhta Hun Main

Tousief Tabish

aa.ine ke ru-ba-ru ik aa.ina rakhta huun main

rat-din hairat men ḳhud ko mubtala rakhta huun main

doston vaali bhi ik ḳhubi hai un men is liye

dushmanon se bhi musalsal rabta rakhta huun main

roz-o-shab main ghumta huun vaqt ki pur-kar par

apne charon samt koi da.era rakhta huun main

khaTkhaTane ki bhi zahmat koi aḳhir kyuun kare

is liye bhi ghar ka darvaza khula rakhta huun main

aj-kal ḳhud se bhi hai ranjish ka koi silsila

aj-kal ḳhud se bhi thoḌa fasla rakhta huun main

chand yaden ek chehra ek ḳhvahish ek ḳhvab

apne dil men aur kya un ke siva rakhta huun main

chand tasviren kitaben ḳhushbuen aur ek phuul

apni almari men ‘tabish’ aur kya rakhta huun main