aa.ina dekhen na ham aks hi apna dekhen
jab bhi dekhen to ham apne ko akela dekhen
mom ke log kaḌi dhuup men aa baiThe hain
aao ab un ke pighalne ka tamasha dekhen
tab ye ehsas hamen hoga ki ye ḳhvab hai sab
band ankhon ko karen ḳhvab ki duniya dekhen
baat karte hain to nashtar sa utar jaata hai
ab vo lahje ki tamazat ka ḳhasara dekhen
tu ne nazren na milane ki qasam khaa.i hai
aa.ina samne rakh kar tira chehra dekhen
koi bhi shai hasin lagti nahin jab tere siva
ye bata shahr men ham tere siva kya dekhen
qatl aur ḳhuun ke manazir hain jo basti basti
kaise insanon ki duniya ka tamasha dekhen
itna virani se rishta hai ‘zafar’ apna ab
ḳhvab ki duniya men bhi sahra hi sahra dekhen
Leave a Reply