Sayed Mujeebul Hasan
aa.ina ahd-e-guzashta ka bacha rah gaya hai
taq-e-nisyan pe abhi ek diya rah gaya hai
khiḌkiyan so ga.iin ḳhamosh hue saare charagh
ik daricha magar is ghar ka khula rah gaya hai
ai hava ab to na kar aag ugalne ka amal
shaḳh par bas yahi ik patta hara rah gaya hai
kahin Thokar se koi zaḳhm na aa jaa.e tujhe
dil hamara tire qadmon men paḌa rah gaya hai
ab hai dariya men koi shor na halchal koi
ho ke ḳhamosh mira sang-e-nava rah gaya hai
kis liye aa.i hai tu ujḌe hue gulshan men
ab bhi kuchh kahne ko kya bad-e-saba rah gaya hai
zikr aa jaata hai rasman sar-e-mahfil aksar
ab tira naam faqat ḳhauf-e-ḳhuda rah gaya hai
aisa lagta hai ki kuchh moḌ hain baaqi gham ke
uThte uThte jo mira dast-e-dua rah gaya hai
ai hava rasta de us ko nikalne ke liye
bujh ga.i aag dhuan ghar men bhara rah gaya hai
kis liye zid kiye hai chhoḌ ke jaane ki mujhe
ḳhamushi tere siva paas men kya rah gaya hai
us ke chehre pe chamak hai na koi rang ‘mujib’
haan hatheli pe magar rang-e-hina rah gaya hai
Leave a Reply