aai hai kuchh na puchh qayamat kahan kahan
uf le gai hai mujh ko mohabbat kahan kahan
betabi-o-sukun ki huiin manzilen tamam
bahlaen tujh se chhut ke tabiat kahan kahan
furqat ho ya visal vahi iztirab hai
tera asar hai ai gham-e-furqat kahan kahan
har jumbish-e-nigah men sad-kaif be-khudi
bharti phiregi husn ki niyyat kahan kahan
rah-e-talab men chhod diya dil ka saath bhi
phirte liye hue ye musibat kahan kahan
dil ke ufaq tak ab to hain parchhaiyan tiri
le jaae ab to dekh ye vahshat kahan kahan
ai nargis-e-siyah bata de tire nisar
kis kis ko hai ye hosh ye ghaflat kahan kahan
nairang-e-ishq ki hai koi intiha ki ye
ye gham kahan kahan ye masarrat kahan kahan
beganagi par us ki zamane se ehtiraz
dar-parda us ada ki shikayat kahan kahan
farq aa gaya tha daur-e-hayat-o-mamat men
aai hai aaj yaad vo surat kahan kahan
jaise fana baqa men bhi koi kami si ho
mujh ko padi hai teri zarurat kahan kahan
duniya se ai dal itni tabiat bhari na thi
tere liye uthai nadamat kahan kahan
ab imtiyaz-e-ishq-o-havas bhi nahin raha
hoti hai teri chashm-e-inayat kahan kahan
har gaam par tariq-e-mohabbat men maut thi
is raah men khule dar-e-rahmat kahan kahan
hosh-o-junun bhi ab to bas ik baat hain ‘firaq’
hoti hai us nazar ki shararat kahan kahan
Leave a Reply