ah-o-fariyad se ma.amur chaman hai ki jo tha
ma.il-e-jaur vahi charḳh-e-kuhan hai ki jo tha
husn pabandi-e-adab-e-jafa par majbur
ishq avara sar-e-koh-o-daman hai ki jo tha
laakh badla sahi mansur ka a.in-e-hayat
aaj bhi silsila-e-dar-o-rasan hai ki jo tha
Dar ke chaunk uThti hain ḳhvabon se naveli kaliyan
ḳhanda-e-gul men vahi saz-e-mehan hai ki jo tha
shabnam-afshani-e-gulshan hai dam-e-sub.h hanuz
lala-o-gul pe vo ashkon ka kafan hai ki jo tha
dil-e-be-tab pe maazi ki navazish hai vahi
shab-e-mahtab pe yadon ka gahan hai ki jo tha
haath rakh deta hai shane pe tasavvur un ka
gham ki raton men koi jalva-figan hai ki jo tha
unhen kya fikr ki puchhen dil-e-bimar ka haal
be-niyazana vo andaz-e-suḳhan hai ki jo tha
laakh badla sahi ai ‘fauq’ zamana lekin
tere andaz men be-saḳhta-pan hai ki jo tha
Leave a Reply