Adeem Hashmi
aghosh-e-sitam men hi chhupa le koi aa kar
tanha to tadapne se bacha le koi aa kar
sahra men uga huun ki miri chhanv koi paae
hilta huun ki patton ki hava le koi aa kar
bikta to nahin huun na mire daam bahut hain
raste men pada huun ki utha le koi aa kar
kashti huun mujhe koi kinare se to khole
tufan ke hi kar jaae havale koi aa kar
jab khinch liya hai mujhe maidan-e-sitam men
dil khol ke hasrat bhi nikale koi aa kar
do chaar kharashon se ho taskin-e-jafa kya
shisha huun to patthar pe uchhale koi aa kar
mere kisi ehsan ka badla na chukae
apni hi vafaon ka sila le koi aa kar
Leave a Reply