aag si barasti hai sabz sabz patton se
duur bhagte hain log shahr ke daraḳhton se
pichhli raat jab har su zulmaton ka pahra tha
ek chand nikla tha in hasin darichon se
jaane chhu ga.e honge kis ke phuul se paanv
ik mahak si uThti hai is nagar ke raston se
aaj ke zamane men kis ko hai sukun hasil
sab hain bar-sar-e-paikar apni apni sochon se
tirgi se bhi jis ki phuul se jhaḌen ‘betab’
kyuun vo raushni mange dusron ki sub.hon se
Leave a Reply