Aadmi Aadmi Se Milte Hain

aadmi aadmi se milte hain

aap bhi kya kisi se milte hain

ye hasin jis kisi se milte hain

janta hai mujhi se milte hain

ham se furqat-nasib kya janen

jo maze zindagi se milte hain

kya bataen junun men kya kya lutf

ham ko un ki hansi se milte hain

kya kahen jab vo milte hain tanha

un se ham kis khushi se milte hain

us ki surat ko phir koi dekhe

jis se vo be-rukhi se milte hain

un ki rukhsat ke vaqt ham un se

haae kis bekasi se milte hain

laakh gham-e-zindagi hai khud yaani

laakh gham-e-zindagi se milte hain

apne mazhab men hai nifaq haram

jis se milte hain ji se milte hain

sukhan-e-‘dagh’ ke mire ‘raghib’

sukhan-e-‘shauq’ hi se milte hain