KHaraba Aur Hota Hai KHarab Aahista Aahista

Poet

ḳharaba aur hota hai ḳharab ahista ahista

dayar-e-dil pe aate hain azaab ahista ahista

saval-e-vahshat-e-jan ke javab ahista ahista

but-e-kafir uThate hain naqab ahista ahista

koi dast-e-hina.i mu-qalam se bharta jaata hai

nigar-e-sham men rang-e-sharab ahista ahista

bagula ibtida-e-shauq men mahmil dikha.i de

nazar aate hain sahra men sarab ahista ahista

bahut bosida yadon ke varaq jhaḌne bhi lagte hain

palaT umr-e-guzishta ki kitab ahista ahista

suragh-e-naqsh-e-pa miTte chale jaate hain sahra men

ubharta hai safar men iztirab ahista ahista

kamal-e-shauq-e-nazzara men uryan hota jaata hai

sar-e-bam-e-falak vo mahtab ahista ahista

kabhi ḳhushbu kabhi naghma kabhi rangin pairahan

‘nadim’ ugti hai yuun hi fasl-e-ḳhvab ahista ahista