dard hi deta hai ab vo na dava deta hai
haa.e kaisa vo vafaon ka sila deta hai
main ne piine ke liye haath baḌhaya kab tha
apne hathon se koi aa ke pila deta hai
girne lagte hain agar ashk miri ankhon se
apna daman koi chupke se baḌha deta hai
jis ne ik baar bhi dekhi hai tajalli teri
saare aalam ko vo nazron se gira deta hai
un ki ḳhushiyon pe hi mauquf nahin apni ḳhushi
un ka baḳhsha hua har gham bhi maza deta hai
aarzu ye hai ki main hosh men aa.uun na kabhi
apni hathon se vo daman ki hava deta hai
kyon samajhte ho ‘habib’ ashk ko tum mere haqir
ye mire qalb ke tufan ka pata deta hai
Leave a Reply