mausam ka haal aankh ki khiḌki bata.egi
din Dhal gaya hai shaam ki surḳhi bata.egi
murjha ga.e jo shaḳh-e-ajal par khile gulab
ras uḌ gaya hai saans ki titli bata.egi
ankhon pe e’tibar na kar fasla to dekh
dariya ke paar kya hai ye kashti bata.egi
divar par shabih banaengi ungliyan
kam raushni fareb ko panchhi bata.egi
la-hasili ki saan pe azalon ke majare
sadiyon ki dastan bhi chuTki bata.egi
apni hansi ko haal ka paimana kijiye
jitni ḳhushi hai naap ke utni bata.egi
Leave a Reply