ye ujale se karan-ta-ba-karan kaise hain
tere aane ke mire dil men guman kaise hain
fart-e-hairat se ye a.ina unhen dekhta hai
ek chehre men ka.i chehre nihan kaise hain
koi shisha hai ki patthar hai ki sapna koi
jo na pahchan sakin shisha-garan kaise hain
tere raste se juda tha mira rasta lekin
tere dil par mire qadmon ke nishan kaise hain
ek uljhan hai jo ghere men liye rahti hai
ham ko hona tha kahin aur yahan kaise hain
main to phulon ki makin ḳhvab-nagar ki baasi
phir ye aansu miri ankhon se ravan kaise hain
ab jo lauTe ho to ankhon men udasi kyuun hai
pas-e-mizhgan ye sitare se nihan kaise hain
vo jo bhaTke hi nahin the kabhi manzil se ‘farah’
un ke chehron pe likhe sud-o-ziyan kaise hain
Leave a Reply