mar ke TuuTa hai kahin silsila-e-qaid-e-hayat
magar itna hai ki zanjir badal jaati hai
asar-e-ishq taghaful bhi hai bedad bhi hai
vahi taqsir hai tazir badal jaati hai
kahte kahte mira afsana gila hota hai
dekhte dekhte taqdir badal jaati hai
roz hai dard-e-mohabbat ka nirala andaz
roz dil men tiri tasvir badal jaati hai
ghar men rahta hai tire dam se ujala hi kuchh aur
mah o ḳhurshid ki tanvir badal jaati hai
gham nasibon men hai ‘fani’ gham-e-duniya ho ki ishq
dil ki taqdir se tadbir badal jaati hai
Leave a Reply