kahan sabat-e-gham-e-dil kahan sarab-e-sukun
vo ḳhush-nasib hai mil jaa.e jis ko soz-e-darun
ḳhud aap dekh len kya haal dil zaban se kahun
abhi to hain miri ankhon men chand qatra-e-ḳhun
ye shahr-e-ham-nafasan kitni baar ujḌa hai
kabhi na ho saka lekin sar-e-hayat nigun
abhi to maslahat-e-vaqt hi pe nazan hai
abhi ḳhirad ko mayassar kahan maqam-e-junun
nigah nichi kiye munfa.il se baiThe hain
ab un se shikva-e-bedad kis zaban se karun
nikhar aa hi gaya ḳhushk ḳhushk chehron par
mila to girya-e-shabnam se kuchh gulon ko sukun
dar-asl hai miri hasti ki ka.enat ‘ejaz’
vo ik nigah jise zindagi ka raaz kahun
Leave a Reply