nahin shauq-e-ḳharidari men dauḌe ja raha hai
ye gahak sair-e-bazari men dauḌe ja raha hai
mayassar kuchh nahin hai khel men la-hasili ke
yunhi be-kar bekari men dauḌe ja raha hai
uTha.e phir raha hai kotval-e-umr chabuk
badan majbur lachari men dauḌe ja raha hai
khaḌi hai manfa.at hairan bahar da.ere se
ziyan apni ziyan-kari men dauḌe ja raha hai
Thaharna bhi kahan hai sahal in sayyargan ko
na sabit se hi sayyari men dauḌe ja raha hai
utara ḳhvahishon ka hai izafi bojh sar se
to asani se dushvari men dauḌe ja raha hai
nahin himmat ki jis men ho zamane ke muqabil
vo apne ghar ki rahdari men dauḌe ja raha hai
nahin milta magar rauzan ki nikle aks bahar
pas-e-a.ina-zangari men dauḌe ja raha hai
sameTa jhuuT ki parkar ne hai pesh-o-pas ko
ki ab har sach riya-kari men dauḌe ja raha hai
ḳhabar hai rut badalne ki agar rashk-e-saba vo
ḳhiram-andaz gulzari men dauḌe ja raha hai
Leave a Reply