Ejaz Ansari
ye teri yaad hai tera ḳhayal hai kya hai
andheri raat hai phir bhi bahut ujala hai
vafa fareb hai ‘ejaz’ ishq dhoka hai
bina gharaz ke yahan kaun kis se milta hai
ghamon ne chehra kuchh itna bigaḌ rakkha hai
ki aa.ina ho muqabil to ḳhauf aata hai
badan hai shaḳh ki manind gul sa chehra hai
hamari jagti ankhon ne kis ko dekha hai
gharaz-parast mohabbat ki baat karne lage
na jaane aaj ka suraj kidhar se nikla hai
kabhi sitam bhi tira pur-kashish nazar aaya
kabhi karam bhi tira nagavar guzra hai
kitab-e-dil pe zara ghaur se nazar Daalo
varaq varaq pe tumhara hi naam likkha hai
ye kis ki laash paḌi hai saḌak pe la-varis
ye kis ka naam likha hai ye kis ka basta hai
hai nok-e-neza pe bhi fat.h ki ada ‘ejaz’
hamara sar abhi qatil ke sar se uncha hai
Leave a Reply