jab kabhi dard ki tasvir banane nikle
zaḳhm ki tah men ka.i zaḳhm purane nikle
chain milta hai tire shauq ko puura kar ke
varna ai laḳht-e-jigar kaun kamane nikle
vaqt ki gard men paivast the sab zaḳhm mire
jab chali tez hava laakh fasane nikle
ye kisi taur bhi allah ko manzur nahin
ki tu ehsan kare aur jatane nikle
pahle nafrat ki vo divar gira.e ‘ahya’
phir mohabbat ka naya shahr basane nikle
Leave a Reply