DhunDhne se yuun to is duniya men kya milta nahin
sach agar puchho to sachcha ashna milta nahin
aap ke jo yaar bante hain vo hain matlab ke yaar
is zamane men muhibb-e-ba-safa milta nahin
siraton men bhi hai insanon ki baham iḳhtilaf
ek se surat men jaise dusra milta nahin
dair o kaaba men bhaTakte phir rahe hain raat din
DhunDhne se bhi to bandon ko ḳhuda milta nahin
hain pareshan aur hairan jaa.en to jaa.en kidhar
rah-gum-gashton ko manzil ka pata milta nahin
bul-havas dil ki tarah har rang hai sarf-e-shikast
laala o gul men bhi rang-e-der-pa milta nahin
hai yahan to sair-e-gulzar-e-ḳhayal nau-ba-nau
haan asiro ham ko mazmun kuchh naya milta nahin
roiye rona zamane ka to ‘kaifi’ kis ke paas
koi is dil ke siva dard-ashna milta nahin
Leave a Reply