ujala hi ujala raushni hi raushni hai
andhere men jo teri aankh mujh ko dekhti hai
abhi jaaga hua huun main ki thak kar so chuka huun
diye ki lau se koi aankh mujh ko dekhti hai
tajassus har ufuq par DhunDhta rahta hai us ko
kahan se aur kaisi aankh mujh ko dekhti hai
amal ke vaqt ye ehsas rahta hai hamesha
mire andar se apni aankh mujh ko dekhti hai
main jab bhi raste men apne pichhe dekhta huun
vahi ashkon men bhigi aankh mujh ko dekhti hai
kahin se haath baḌhte hain mire chehre ki janib
kahin se surḳh hoti aankh mujh ko dekhti hai
darḳhto mujh ko apne sabz patton men chhupa lo
falak se ek jalti aankh mujh ko dekhti hai
Leave a Reply