Chandrabhan Khayal
phir lauT ke aaya huun tanha.i ke jangal men
ik shahar-e-tasavvur hai ehsas ke har-pal men
tu misr ki malika hai main yusuf-e-kan.an huun
afsos magar gum hain tafriq ke daldal men
insan ki duniya men insan hai pareshan kyuun
machhli to nahin hoti bechain kabhi jal men
har fikr ke chehre par sau zaḳhm hain maazi ke
ik lafz nahin zinda avaz ke maqtal men
chuTki men masalte hain tinke bhi pahaḌon ko
jab ḳhuun simaTta hai mazlum ke anchal men
phir chhoḌ diya tanha duniya ne ‘ḳhayal’ ham ko
phir zehn pareshan hai jazbat ki halchal men
Leave a Reply