Chandrabhan Khayal
daulat-e-haq mujh ko hasil ho ga.i hai
zindagi ab aur mushkil ho ga.i hai
ab nahin asan duniya se guzarna
is ki parchha.in muqabil ho ga.i hai
log manzil ki taraf lapke hain lekin
bhiiḌ men ghaflat bhi shamil ho ga.i hai
saath tufan-e-havadis hai magar ab
zindagi nazdik-e-sahil ho ga.i hai
dusri duniyaon ki chahat men dekho
meri duniya ḳhud se ghafil ho ga.i hai
din haqa.eq se ulajhte kaT gaya phir
raat lekin nazr-e-batil ho ga.i hai
jab kabhi lafzon ko main ne di sada.en
ik sada-e-ghaib nazil ho ga.i hai
Leave a Reply