zamane ki fasilon ko gira kar
kabhi dekhenge ḳhud ko aazma kar
mire dil par bhi nazil ho sakinat
mire murshid mire haq men dua kar
tumhari raah ko raushan kiya hai
charagh-e-jan ko main ne jala kar
kisi din ham tumhari ḳhak-dan ko
chale ja.enge ik Thokar laga kar
tumhara rasta hamvar kar duun
main apni zaat ka patthar haTa kar
falak ke paar mujh ko dekhna hai
sitaron se bhari chadar haTa kar
akele baiTh ke rote rahe ham
tumhari yaad men duniya bhula kar
khuli ankhon men sapne dekhti huun
ḳhud apni niind ka panchhi uḌa kar
Leave a Reply