Shumama Ufuq
yuun sub.h dikha.enge ham raat ke maron ko
Tankenge dupaTTe par TuuTe hue taron ko
ankhen hi nahin pahle manzar bhi naya dena
phir ret se uljhana un ḳhvab-savaron ko
mehrab se dil-andar gunji hai mohabbat phir
darvaza na khola to Dha.egi minaron ko
ta-hadd-e-nazar hai ab ta-hadd-e-nazar paani
tufan ki aamad ab toḌegi kinaron ko
ik kuunj sisakti hai miTTi men daba.e chonch
jab shaam ko takti hai luuTi hui Daron ko
aa jaa.e hamara naam us shaḳhs ke honTon par
ab aag lage saare ḳhamosh isharon ko
kis samt se aa.e the kis samt ga.e honge
tum ne bhi nahin dekha un naqa-savaron ko
kaase men tasavvur ke ik aks ghanimat hai
ḳhali nahin lauTaya bilqis ne yaron ko
Leave a Reply