abdurrahman-wasif

Ye Mat Samajh Ki Tere Sath Kuchh Nahin Karega

ye mat samajh ki tire saath kuchh nahin karega

nizam-e-arz-o-samavat kuchh nahin karega

ye tera maal kisi roz Das hi lega tujhe

agar tu is men se khairat kuchh nahin karega

abhi pitari to kholi nahin madari ne

tu kah raha hai kamalat kuchh nahin karega

mujhe yaqin dila sab rahega vaisa hi

junun-e-ahl-e-kharabat kuchh nahin karega

hamin sabil nikalenge baithne ki koi

vo shakhs bahr-e-mulaqat kuchh nahin karega

agar dilon men lapakti hai aag nafrat ki

to phir ye ahd-e-muvakhat kuchh nahin karega

More Poems

Leave a Comment