Yaadon Ke Ambar Lage The

Sohail Azad

yadon ke ambar lage the

ḳhali packet bhare paḌe the

jaane kaun sa dukh haavi tha

jaane kyon itna hanste the

us bezar gali se ho kar

ham aksar aate jaate the

ḳhvabon ke bosida manzar

ankhon ankhon jhank rahe the

avazon ke gunge lashkar

raat ka siina chiir rahe the

gul-danon ko yaad nahin ab

pahle kaun se phuul saje the

ham bhi pagal the jo tum se

apna ji halka karte the

kaisi vahshat-nak faza thi

chaa.e ke ḳhali cup kahte the

meri is viran-sara tak

kuchh saa.e pichha karte the

kitni purani ḳhabren thi vo

jin ko ham taaza karte the

afsanon ki bhiiḌ men kho kar

ham ḳhud ko DhunDa karte the