Yaadon Ke Ambar Lage The

yādoñ ke ambār lage the

ḳhālī packet bhare paḌe the

jaane kaun sā dukh haavī thā

jaane kyoñ itnā hañste the

us bezār galī se ho kar

ham aksar aate jaate the

ḳhvāboñ ke bosīda manzar

āñkhoñ āñkhoñ jhāñk rahe the

āvāzoñ ke gūñge lashkar

raat kā siina chiir rahe the

gul-dānoñ ko yaad nahīñ ab

pahle kaun se phuul saje the

ham bhī pāgal the jo tum se

apnā jī halkā karte the

kaisī vahshat-nāk fazā thī

chaa.e ke ḳhālī cup kahte the

merī is vīrān-sarā tak

kuchh saa.e pīchhā karte the

kitnī purānī ḳhabreñ thī vo

jin ko ham taaza karte the

afsānoñ kī bhiiḌ meñ kho kar

ham ḳhud ko DhūñDā karte the

Leave a Comment