ya mulaqat ke imkan se bahar ho ja
ya kisi din miri fursat ko mayassar ho ja
tujh ko ma.alum nahin hai miri ḳhvahish kya hai
mujh pe ehsan na kar aur subuk-sar ho ja
irtiqa kya tiri qismat men nahin likkha hai
ab tamanna se guzar mera muqaddar ho ja
main jahan paanv rakhun vaan se bagula uTThe
reg-e-sahra miri vahshat ke barabar ho ja
ai mire harf-e-suḳhan tu mujhe hairan kar de
to kisi din miri ummid se baḌh kar ho ja
Leave a Reply