Ali Sardar Jafri
vufur-e-shauq ki rangin hikayaten mat puchh
labon ka pyaar nigah ki shikayaten mat puchh
kisi nigah ki nas nas men tairte nishtar
vo ibtida-e-mohabbat ki rahaten mat puchh
vo nim-shab vo javan husn vo vufur-e-niyaz
nigah o dil ne jo ki hain ibadaten mat puchh
hujum-e-gham men bhi jiina sikha diya ham ko
gham-e-jahan ki hain kya kya inayaten mat puchh
ye sirf ek qayamat hai chain ki karvat
dabi hain dil men hazaron qayamaten mat puchh
bas ek harf-e-baghavat zaban se nikla tha
shahid ho gaiin kitni rivayaten mat puchh
ab aaj qissa-e-dara-o-jam ka kya hoga
hamare paas hain apni hikayaten mat puchh
nishan-e-hitlari-o-qaisari nahin milta
jo ibraton ne likhi hain ibaraten mat puchh
nashat-e-zist faqat ahl-e-gham ki hai miras
milengi aur abhi kitni daulaten mat puchh
Leave a Reply