Jahanzeb Sahir
vaqt ke saath na.i soch men Dhal jaate hain
ham vo sikke hain jo har daur men chal jaate hain
itne manus hue mujh se mire ghar ke charagh
shaam hote hi mujhe dekh ke jal jaate hain
dekh leta huun jo kuchh der tiri ankhon ko
teri ankhon se mire ḳhvab badal jaate hain
ik takalluf men lihafon ka sahara le kar
astinon men chhupe saanp bhi pal jaate hain
vaqt kab haath se jaata hai kisi ke ‘sahir’
vaqt ke haath se ham log nikal jaate hain
Leave a Reply