vaqt-e-aḳhir yaad hai saaqi ki mehmani mujhe
marte marte de diya angur ka paani mujhe
vo miri surat to dekhen apni surat ke liye
kaash a.ina bana de meri hairani mujhe
kaT gaya hai vasl se pahle zamana umr ka
haa.e dhoka de gaya bahta hua paani mujhe
daman-e-sahra se lunga mar ke vahshat men kafan
ik naya joḌa pinha.egi ye uryani mujhe
mere gul ko la ya apne phuul le ja andalib
aise kanTon se nahin fansen nikalvani mujhe
tum agar chaho to miTTi se abhi paida hon phuul
main agar mangun to dariya bhi na de paani mujhe
tishna-kami is ko kahte hain ki bahr-e-ishq men
main agar utrun to uupar phenk de paani mujhe
aisi mushkil tum ne Daali hai ki jab mar ja.unga
muddaton roya karegi meri asani mujhe
tu ne itni di ki mai-ḳhvari ki hasrat bah ga.i
main ne itni pi ki aḳhir ho ga.i paani mujhe
rone jaata huun main apni hasraton ke Dher par
be-kasi aa kar sikha de marsiya-ḳhvani mujhe
hashr men chalna paḌega ek TeḌha rasta
kucha-e-janan sikha de Thokaren khani mujhe
‘muztar’ apne haq ke kanTe chun ke main ruḳhsat hua
aur kya deti bahar-e-gulshan-e-fani mujhe
Leave a Reply