Hasan Abbasi
udaas shamon bujhe darichon men lauT aaya
bichhaḌ ke us se main apni galiyon men lauT aaya
chamakti saḌkon pe koi mera nahin tha so main
malul peḌon ujaaḌ raston men lauT aaya
ḳhizan ke aghaz men ye achchha hua ki main bhi
ḳhud apne jaise fasurda logon men lauT aaya
hasin yadon ke chand ko alvida.a kah kar
main apne ghar ke andhere kamron men lauT aaya
main khul ke roya nahin tha pichhle ka.i baras se
‘hasan’ vo sailab phir se ankhon men lauT aaya
Leave a Reply