Nabeel Ahmad Nabeel
tum ne kiya hai tum ne ishara bahut ghalat
dariya bahut durust kinara bahut ghalat
is haar men hai haath tumhara bahut ghalat
tum ne kiya hai faisla saara bahut ghalat
ham Duub jaa.en apne hi gham ke bahao men
haan haan ghalat ghalat mire yaara bahut ghalat
is kisht-e-dil se is ke dil-e-reg-zar tak
bahne laga hai ḳhuun ka dhara bahut ghalat
afsos mujh ko is pe saza hijr ki mili
main ne likha tha naam tumhara bahut ghalat
maidan men ek fard bhi zinda na mil saka
shab-ḳhun us ne aḳhiri maara bahut ghalat
ham hain zamin ke log magar dekh ai falak
leta hai imtihan tu hamara bahut ghalat
hoga kisi to roz tumhara hisab bhi
tum ne kisi gharib ko maara bahut ghalat
vaqif tha apne ishq ke anjam se magar
phir bhi kisi pe jaan ko vaara bahut ghalat
ham dil-zadon ke vaste ye shab hi Thiik hai
nikla hai shab ka aḳhiri taara bahut ghalat
afsos ai ‘nabil’ ye tum ne samajh liya
dil ko bhi jal bujha sa sharara bahut ghalat
chehra sadaqaton ka hua masḳh ai ‘nabil’
us ne bahaya jhuuT ka dhara bahut ghalat
Leave a Reply