abrar-ahmad

Tum Jo Aate Ho

din nikalte hain bikhar jaate hain

shahr baste hain ujad jaate hain

dastaken ahani darvaze par

sar ko takra ke palat jaati hain

gumbad-e-khamushi girta hi nahin

chalti rahti hai hava

kheton men dalanon men

aur apne hi talatum men utar jaati hai

har taraf phuul bikhar jaate hain

dil ki mitti pe koi rang utarta hi nahin

aankh nazzara-e-mauhum se hatti hi nahin

zehn us hajla-e-tariki-o-tanhai men

apne kanton pe pada rahta hai

vaqt aata hai guzar jaata hai

tum jo aate ho to tartib ulat jaati hai

dhund jaise kahin chhat jaati hai

naram poron se koi haule se

dil ki divar gira deta hai

ek khidki kahin khul jaati hai

aankh ik jalva-e-sad-rang se bhar jaati hai

koi avaz bulati hai hamen

tum jo aate ho

to is habs dukhan ke ghar se

ranj-e-ainda-o-rafta ki thakavat se

nikal lete hain

tum se milte hain

to duniya se bhi mil lete hain

More Poems

Leave a Comment