Rasa Chughtai
tere aane ka intizar raha
umr bhar mausam-e-bahar raha
pa-ba-zanjir zulf-e-yar rahi
dil asir-e-ḳhayal-e-yar raha
saath apne ghamon ki dhuup rahi
saath ik sarv-e-saya-dar raha
main pareshan-hal ashufta
surat-e-rang-e-rozgar raha
aa.ina aa.ina raha phir bhi
laakh dar-parda-e-ghubar raha
kab hava.en tah-e-kamand aa.iin
kab nigahon pe iḳhtiyar raha
tujh se milne ko be-qarar tha dil
tujh se mil kar bhi be-qarar raha
Leave a Reply