takmil-e-ishq jab ho ki sahra bhi chhoḌ de
majnun ḳhayal-e-mahmil-e-laila bhi chhoḌ de
kuchh iqtiza-e-dil se nahin aql be-niyaz
tanha ye rah sake to vo tanha bhi chhoḌ de
ya dekh zahid us ko pas-e-parda-e-majaz
ya e’tibar-e-dida-e-bina bhi chhoḌ de
kuchh lutf dekhna hai to sauda-e-ishq men
ai sarfarosh sar ki tamanna bhi chhoḌ de
vo dard hai ki dard sarapa bana diya
main vo mariz huun jise iisa bhi chhoḌ de
ankhen nahin jo qabil-e-nazzara-e-jamal
talib se kah do zauq-e-tamasha bhi chhoḌ de
hai barq-pashiyon ka gila ‘sehr’ ko abas
kya us ke vaste koi hansna bhi chhoḌ de
Leave a Reply