Takmil-E-Ishq Jab Ho Ki Sahra Bhi chhoD De

takmīl-e-ishq jab ho ki sahrā bhī chhoḌ de

majnūñ ḳhayāl-e-mahmil-e-lailā bhī chhoḌ de

kuchh iqtizā-e-dil se nahīñ aql be-niyāz

tanhā ye rah sake to vo tanhā bhī chhoḌ de

yā dekh zāhid us ko pas-e-parda-e-majāz

yā e’tibār-e-dīda-e-bīnā bhī chhoḌ de

kuchh lutf dekhnā hai to saudā-e-ishq meñ

ai sarfarosh sar kī tamannā bhī chhoḌ de

vo dard hai ki dard sarāpā banā diyā

maiñ vo marīz huuñ jise iisā bhī chhoḌ de

āñkheñ nahīñ jo qābil-e-nazzāra-e-jamāl

tālib se kah do zauq-e-tamāshā bhī chhoḌ de

hai barq-pāshiyoñ kā gila ‘sehr’ ko abas

kyā us ke vāste koī hañsnā bhī chhoḌ de

Leave a Comment