Afzal Naved
subu uthaun to piine ke biich khulti hai
koi gali mere siine ke biich khulti hai
tamam raat sitare talash karte hain
vo chandni kisi ziine ke biich khulti hai
tu dekhta hai to tashkil paane lagta huun
miri bisat nagine ke biich khulti hai
giraft-e-hosh nahin sahal dast-bardari
girah ye sakht qarine ke biich khulti hai
kinara-e-mah-o-anjum jahan tilak bhi ho
ye raushni isi jiine ke biich khulti hai
na badban koi aur na rud-o-samt-o-sukun
to kis ki khinch safine ke biich khulti hai
rukun to dekh sakun asman ki khidki
jo ek baar mahine ke biich khulti hai
zara sa aur bhi kiina ai kina-parvar-e-jan
miri nazar tire kiine ke biich khulti hai
ye kaun chhod gaya hai maqam-e-asl ‘naved’
ye kis ki baas dafine ke biich khulti hai
Leave a Reply